Sljedeće godine, Ferrari proslavlja svoj 70. rođendan, a kako bi ga obilježili na pravi način, predstavili su nam LaFerrari Aperta hiperautomobil, kao i detaljan plan o konstruisanju samo 350 primjeraka ovog ograničenog izdanja.
Na Salonu automobila u Parizu, Ferrari je predstavio ovu tzv. spider verziju svog hipersportskog modela LaFerrari. Pošto su Ferrarijevi glavni konkurenti, poput Bentleyja i Lamborghinija preskočili ovogodišnji sajam u Parizu, LaFerrari Aperta je ujedno bila i apsolutna zvijezda sajma.
Novi model dostupan je u verziji sa „tvrdim“ krovom od ugljeničnih vlakana ili sa „mekim“ platnenim krovom, u zavisnosti od želje kupca. Pored očigledne razlike u odnosu na klasični LaFerrari, Aperta je dobila i znatna ojačanja karoserije i šasije, kako bi se očuvala krutost i otpornost na uvijanje, a posebna pažnja je posvećena i očuvanje aerodinamike, koja je na nivou kupea.
Pogon ostaje isti – 6,3-litarski atmosferski V12 motor u kombinaciji sa elektromotorom, koji zajedno oslobađaju preko 950 konjskih snaga. U Ferrariju navode i da su performanse Aperta verzije na nivou onih koje posjeduje standardni LaFerrari. Od nula do sto ubrzava za 3 sekunde, a ima maksimalnu brzinu od 350 kilometara na sat.
Od 350 obećanih modela ograničenog izdanja, svaki će biti proizveden u 70 primjeraka – po jedan za svaku godinu postojanja. Cijena zvanično još nije saopštena, ali se nezvanično saznaje da će se LaFerrari Aperta prodavati po cijeni od 3,5 miliona eura!
